ದೇವಸ್ಥಾನದ ಹಳೆಯ ಚಿತ್ರಣ

     ಶಿವಮೊಗ್ಗ ನಗರದ ಗಾಡಿಕೊಪ್ಪ ಗ್ರಾಮದಲ್ಲಿ ಇರುವಂತಹ ಶ್ರೀ ನಾಗಸುಬ್ರಮಣ್ಯ ದೇವಸ್ಥಾನದ ಪೂರ್ವ ಹಿನ್ನಲೆಗೆ 80 ರಿಂದ 100 ವರ್ಷದ ಇತಿಹಾಸವಿದೆ. 

ಇದೊಂದು ಗದ್ದೆಯ ಜಾಗವಾಗಿದ್ದ,  ಸುತ್ತಮುತ್ತಲ ಗದ್ದೆಗಳನ್ನ ಈ ದೇವಸ್ಥಾನದ ಮೂಲ ದೇವರಾಗಿರುವ ನಾಗನು ಕಾಪಾಡುತ್ತಿದ್ದ ಎಂಬ ಇತಿಹಾಸವಿದೆ. 

ಇತ್ತೀಚಿನ ದಿನಗಳಲ್ಲಿ 80 ವರ್ಷಕ್ಕೆ ಮೇಲ್ಪಟ್ಟಂತವರು ಹೇಳಿದಂತಹ ಇತಿಹಾಸದ ಪುರಾವೆಯನ್ನು ಇಟ್ಟುಕೊಂಡು ಇದೊಂದು ಐತಿಹಾಸಿಕ ಹುತ್ತದಿಂದ ಮತ್ತು ನಾಗನ ವಿಗ್ರಹದೊಂದಿಗೆ ಇರುವಂತಹ ದೇವಸ್ಥಾನವಾಗಿತ್ತು. 

ಇದು ಕಾಲ ಕಳೆದಂತೆ ಶಿವಮೊಗ್ಗ ನಗರಕ್ಕೆ ವ್ಯಾಪಿಸಿ ಇದನ್ನ ಶಿವಮೊಗ್ಗ ನಗರಾಭಿವೃದ್ಧಿ ಪ್ರಾಧಿಕಾರ ಈ ಜಾಗವನ್ನ ಬಡಾವಣೆ ಮಾಡುವುದಾಗಿ ಘೋಷಿಸಿತು. ಅಂತಹ ಸಂದರ್ಭದಲ್ಲಿ ಶಿವಮೊಗ್ಗ ನಗರದ ಮತ್ತು ಸ್ವಾಮಿ ವಿವೇಕಾನಂದ ಬಡಾವಣೆಯ ಹಲವಾರು ಹಿರಿಯ ಪ್ರಮುಖರೆಲ್ಲರೂ ಸೇರಿ ಶಿವಮೊಗ್ಗ ನಗರಾಭಿವೃದ್ಧಿ ಪ್ರಾಧಿಕಾರದ ಹತ್ತಿರ ಹೋಗಿ ಕೇಳಿಕೊಂಡು ಈ ದೇವಸ್ಥಾನವನ್ನ ಜೀರ್ಣೋದ್ಧಾರ ಮಾಡುತ್ತೇವೆ ಎಂಬುದಾಗಿ ಹೇಳಿ ಈ ಜಾಗವನ್ನ ಸ್ವಾಮಿ ವಿವೇಕಾನಂದ ಅಡ್ವೆಂಚರ್ಸ್ ಅಂಡ್ ಸ್ಪೋಟ್ಸ್ ಕ್ಲಬ್ ಗೆ ಹಸ್ತಾಂತರಿಸಿದರು. ಅದು ಶ್ರೀನಾಗಸುಬ್ರಹ್ಮಣ್ಯ ದೇವಸ್ಥಾನ ಸೇವಾ ಸಮಿತಿ ಎಂಬ ಉಪ ಸಮಿತಿ ರಚಿಸಿ ಅದರ ಅನ್ವಯ ದೇವಸ್ಥಾನ ನಿರ್ವಹಿಸುತ್ತಿದೆ..

2005 ರಲ್ಲಿ ಶ್ರೀಮದ್ ಜಗದ್ಗುರು ಶಂಕರಾಚಾರ್ಯ ಶ್ರೀ ಶ್ರೀ ಭಾರತಿತೀರ್ಥ ಮಹಾಸ್ವಾಮಿಗಳು  

ದಕ್ಷಿಣಾಮ್ನಾಯ ಶೃಂಗೇರಿ ಶಾರದಾ ಪೀಠ, ಇವರ ಅಮೃತ ಹಸ್ತದಿಂದ ಪುಷ್ಪಾರ್ಚನೆಯ ಮುಖಾಂತರವಾಗಿ ದೇವಸ್ಥಾನದ ಜೀರ್ಣೋದ್ಧಾರವು ಪ್ರಾರಂಭವಾಯಿತು. 

2005 ರಲ್ಲಿ ಪ್ರಾರಂಭವಾದ ಇದರ ಜೀರ್ಣೋದ್ಧಾರವು 1-5-2009 ಮೇ ತಿಂಗಳಲ್ಲಿ ಶ್ರೀ ನಾಗಸುಬ್ರಮಣ್ಯ ಸ್ವಾಮಿಯ ಮೂರ್ತಿಯ ಪ್ರತಿಷ್ಠಾಪನೆ, ಬ್ರಹ್ಮಕುಂಭಾಭಿಷೇಕವು

ಶ್ರೀಮದ್ ಜಗದ್ಗುರು ಶಂಕರಾಚಾರ್ಯ ಶ್ರೀ ಶ್ರೀ ವಿದ್ಯಾಭಿನವ ವಿದ್ಯಾರಣ್ಯ ಭಾರತಿ ಮಹಾಸ್ವಾಮಿಗಳು ಕೂಡಲಿ ಇವರ ಅಮೃತ ಹಸ್ತದಿಂದ ಲೋಕಾರ್ಪಣೆಗೊಂಡಿತು. ಈ ದೇವಾಲಯಕ್ಕೆ ಅತ್ಯಂತ ಹೆಚ್ಚಿನ ಭಕ್ತಾದಿಗಳಾಗಿದ್ದು, ಸುತ್ತಮುತ್ತ ಇರುವಂತಹ ಎಲ್ಲಾ ಗ್ರಾಮದ ಜನರು ತಮ್ಮ ಮನೆಯ ವಿಶೇಷ ಕಾರ್ಯಕ್ರಮಗಳಲ್ಲಿ ದೇವಸ್ಥಾನಕ್ಕೆ ಬಂದು ಹಣ್ಣು -ಕಾಯಿಯನ್ನ ಮಾಡಿಸಿಕೊಂಡು ದೇವರ ತೀರ್ಥ ಪ್ರಸಾದವನ್ನ ಸ್ವೀಕರಿಸಿ ಮನೆಗೆ ಹಾಕುವಂತಹ ಪದ್ಧತಿ ಈಗಲೂ ಕೂಡ ಇದೆ. 

ದೇವಸ್ಥಾನದ ಸುತ್ತ ಇರುವಂತಹ ಎಲ್ಲಾ ಜಾಗವನ್ನ ನಾಗನ  ನಡೆ ಎಂಬುದಾಗಿ ಪ್ರತೀತಿ ಇದ್ದು ಹಾಗಾಗಿ ದೇವಸ್ಥಾನಕ್ಕೆ ನಡೆದುಕೊಳ್ಳುವಂತಹ ಜನರು ಅತಿ ಹೆಚ್ಚಿದ್ದಾರೆ. ಹಾಗೆಯೇ ಅಂದಿನಿಂದ ಇಂದಿನವರೆಗೂ ನಿತ್ಯವೂ ತ್ರಿಕಾಲ ಪೂಜೆಯನ್ನು ಮಾಡುತ್ತಾ ಹಾಗೆಯೇ ಮಾಸ ಮಾಸಗಳಲ್ಲೂ ಕೂಡ ವಿಶೇಷವಾದಂತಹ ಧಾರ್ಮಿಕ ಚಟುವಟಿಕೆಗಳನ್ನು ನಡೆದುಕೊಂಡು ಬರುವಂತಹ ಪದ್ಧತಿ ಇದೆ. 

ಅಂತೆಯೇ ಈ ದೇವಸ್ಥಾನದ  ಹಾಗೂ ಶಿವಮೊಗ್ಗ ನಗರದ ಇತಿಹಾಸದಲ್ಲೇ ಮೂರು ಬಾರಿ ನಾಗಬ್ರಹ್ಮ ಮಂಡಲೋತ್ಸವ ನಡೆದಿರುವುದು ಅತ್ಯಂತ ವಿಶೇಷವಾಗಿರುವುದು. ಅದಲ್ಲದೆ ಅತ್ಯಂತ ವೈಶಿಷ್ಟ್ಯಪೂರ್ಣವಾಗಿರುವಂತಹ ಕುಕ್ಕೆ ಸುಬ್ರಹ್ಮಣ್ಯದ ರೀತಿಯಲ್ಲಿಯೇ ಈ ದೇವಸ್ಥಾನವು ಇದ್ದು ಇದು ವಲ್ಮೀಕ ಹುತ್ತದಿಂದ ನಾಗನ ಹೆಡೆಯೊಳಗೆ ಸುಬ್ರಹ್ಮಣ್ಯನೊಂದಿಗೆ ಈ ದೇವಸ್ಥಾನವು ಇದ್ದು ದೇವರು ಸರ್ವ ಭಕ್ತರನ್ನು ಆಕರ್ಷಿಸಿ ಅನುಗ್ರಹಿಸುತ್ತಿರುವುದು ವಿಶೇಷ.